Autobusi me pasagjerë doli jashtë rrugës si pasojë e reshjeve të dendura të borës në zonën Genç të Turqisë, ku raportohet se ka viktima dhe të lënduar.

Një autobus pasagjerësh i kompanisë “Mardin Seyahat”, që ishte në lëvizje nga Şırnak drejt Erzurumit, doli nga kontrolli për shkak të akullit në rrugën me kthesa dhe u përmbys në anë të rrugës.

Si pasojë e aksidentit, katër persona humbën jetën dhe 32 të tjerë u lënduan, raportonë cnn turk.

Pas njoftimit, në vendngjarje u dërguan ekipe të ndihmës së shpejtë, UMKE, AFAD, zjarrfikësit, policia dhe xhandarmëria.

Të lënduarit, pasi morën ndihmën e parë, u transportuan për mjekim në spitalet shtetërore të Genç dhe Bingolit.

Guvernatori Ahmet Hamdi Usta, i shoqëruar nga komandanti i xhandarmërisë së provincës, gjeneral brigade Bilgihan Yeşilyurt, dhe prefekti i Gençit, Muhammet Güzel, shkuan në vendin e aksidentit për të kryer inspektime.